SAN ANTONIO DE PADUA
Ang sinugdan ug kapuslanan sa pagbansay sa devocion sa napulog tolo ka Martes nga ihalad kang
SAN ANTONIO DE PADUA
Sa tuig 1617 ginasubsub pagduaw ang Simbahan sa mga Paring Franciscanos sa Siyudad sa Bolonia sa usa ka hamiling babayeng minyo nga sa dakung hinoklog nagapangadye sa atubangan sa usa ka larawan ni San Antonio nga iyang ginapahayag sa kasubo nga gibati sa iyang kasingkasing tungod sa wala niya pagkakaplag sa dugay nga mga tuig sa bunga sa iyang pagkaminyo ug sa dakung paglaum iyang ginapangayo kang San Antonio nga hatagan siya sa maong bunga.
Sa nagapahulay siya sa usa niana ka gabii sa iyang balay, gitunghaan siya ni San Antonio, linibutan sa mga masigang silaw, nga namulong kaniya nga duawon niya siya sa iyang altar sa sulod sa siyam ka Martes nga walay bugto ug iyang madangat ang iyang ginahidlaw ug gitinguha. Gisugot kini niadtong hamili nga babaye ug gituman sa dakung kainit sa iyang kasingkasing kadtong gisugo kaniya sa maong Santo ug tungud sa mga panabang niini, iyang nadangat ang pagkakaplag ug anak sa tapus ang kawhaan ka tuig kutob sa iyang pagkaminyo.
Apan sa iyang pag-anak, iyang gianak dili usa ka matahum nga bata, kun dili usa ka omol nga unod nga walay dagway. Kining masulob-on nga paghitabo niadtong mapuangurong babaye ug mapait nga pagsulay kaniya, wala gayud makakunhod sa iyang pagtooo ug paglaum sa mga panabang ni San Antonio nga daw gikalipay niining Santo ang pagsulay kaniya nga ginapadad-an sa mga kalisdanan. Kadtong mapuangurong babaye, bisan dakung gibati nga kasubo, sa usa ka nawong masayag nagsugo sa pagpadala sa Simbahan sa mga Paring Franciscanos ug pagpatongtong sa altar ni San Antonio niadtong usa ka omol nga unod nga walay dagway nga iyang gianak ug daku kayo ang paglaum nga pamati-on gayud siya ug ihatag kaniya ni San Antonio kadtong gipangayo niya sa dugay nga mga katuigan, nga mao ang usa ka anak nga makalipay kaniya ug sa iyang bana, ug sa pagkamatuod wala makawang ang iyang paglaum.
Igo lamang nga gipahimutang sa altar ni San Antonio kadtong omol nga unod nga giputos sa maputi nga panapton, misugod paglihok ug sa pag-ukab sa maong panapton nga giputos, nagpakita ang usa ka maambong nga bata.
Dihadiha nabantug kining katingalahan nga daku nga nahitabo ug mitunog sa tibuok nga Italia, Francia, Espana ug ubang kalungsoran nga katoliko ug kutub niadto nasangyaw ang pagdevocion ug pagbansay sa siyam ka Martes ni San Antonio nga ginabaslan usab sa maong Santo sa daghanang mga katingalahan.
Ug tungud kay usahay ang mga nagabansay sa siyam ka Martes, wala man sila makatigayon sa mga panabang ni San Antonio nga ilang gipangayo, nagapadayon sila sa pagtawag ug pagtoktok sa pultahan sa kasingkasing ni San Antonio hangtud nga ilang hikaplagan ang ilang ginapangayo nga mga panabang. Sa ingon niini ug sa hinayhinay nahimong napulo ug tulo ka Martes ang ginabansay sa mga devotos ni San Antonio, nga ilang gipahinungod sa adlaw, 13 sa Junio nga maoy paghitabo sa mahimayaong kamatayon sa Santo sa mga Milagros.
Ang Santa Iglesia nagahatag sa iyang pag-uyon niining devocion sa 13 Martes nga takus ikahalad kang San Antonio sa iyang devotos, ug nagatugot sa 4 sa Mayo sa tuig 1894 ug usa ka Indulgencia Plenaria niadtong tanan nga magapasakop sa Pia Union ni San Antonio, nga magabansay sa devocion, sa 13 Martes.
Ang magabansay niining devocion, kinahanglan mokompisal siya ug mokalawat aron iyang himuslan ang Indulgencia Plenaria. Kining pagbansay sa maong devocion mahimo sa bisan unsang bulana, apan angay gayud nga himoon unta sa napulog tulo ka Martes sa dili pa moabut ang adlaw ni San Antonio nga mao ang 13 sa Junio. Angay man usab nga himoon ang maong devocion sa atubangan sa usa ka larawan ni San Antonio ug iyang paninguhaon ang pagbasa sa kinabuhi ni San Antonio. Ang paglimos sa mga pobres, labi na ang pagpaninguha sa pagtabang sa mga kinahanglanon sa mga Escuela Catolica, maoy usa ka buhat nga makapahimuot kaayo kang San Antonio.
Ang pagbansay sa napulog tulo ka Martes, gihubad sa binisaya ni Rev. P. Alejandro Espina.
NOVENA
NI SAN ANTONIO DE PADUA
(Sign of Cross) – Tungod sa timaan santa cruz sa among mga kaaway, bawi-on mo kami Ginoong Dios namo ..Sa ngalan sa Amahan, sa Anak, sa Dios espiritu Santo ..Amen.
ACTO DE CONTRICION
Ginoo kong Jesucristo Dios ug tawo nga matuod magbubuhat ug manunubus ko tungud sa pagka Dios mo, nahagugma ako kanimo labi sa ngatanan, busa nagabasul na ako ug daku uyamut, ug nagahinulsul na ako sa akong mga sala ngatanan sa bug-os kong kasingkasing, ug nagsaad ako ug malig-on nga dili na makasala pag-usab ug likayan ko na man ang mga kahigayonan sa pagpakasala ug magkompisal man ako, ug magtuman sa penitencia nga isugo kanako ihalad ko man kanimo ang akong kinabuhi ang mga buhat ug ang akong kabudlayan ngatanan nga igabayad ko sa akong mga sala ug milaum ako sa imong diosnon nga kaayo ug kalooy nga walay katapusan nga pasayloon mo ako tungud sa pagpasakit, ug pagkamatay mo sa Cruz hatagan mo ako sa imong santos nga gracia nga ikabalhin sa akong mga gawi ug igadayon ko pagtuman sa mga maayong buhat kutub sa ikamatay ko..Amen.
PAG-AMPO
SA TANANG ADLAW NGA MARTES
Mahigugmaon uyamut nga mananabang ko nga San Antonio; sa dakung pagpaubus nagahapa ako sa imong mga tiil, nagahalad kanimo niining santos nga buluhaton aron idangat mo ako sa Dios sa pasaylo sa ngatanan kong mga sala; makagbaton ako sa mga virtudes, makagkanunay pagpuyo sa mga maayong buhat ug makadangat sa ulusahon nga gracia nga niining adlawa akong gipaninguha kon angay man ugaling sa diosnon nga kabubut-on ug sa kaayohan sa akong kalag. Himo-a, o mahimayaon nga Santos, nga sa sulod niining napulo ug tulo ka semana nga akong gihalad sa pagpasidungog kanimo, makapadayon ako unta gihapon sa santos nga pag-alagad sa Dios, ug dili na nga gayud unta mahimulag kaniya tungud sa sala nga mortal hangtud sa akong ikamatay, aron unya mahiagum ako uban kanimo sa himaya nga walay katapusan sa langit. Amen.
UNANG MARTES:
Oh mahimaya-on nga San Antonio! Tungud sa imong pagkamasinugtanon uyamut sa mga gimbut-an nga langitnon, ug tungud man usab sa daku uyamut nga kalipay nga imong gibati sa paghalad mo sa Dios sa imong kaugalingon sa usa ka saad sa pagkaulay, idangat mo ako sa Dios sa gracia nga ikapahiuyon ko sa mga pagbuot nga diosnon, ug ikabaton ko sa virtud sa kaputli sa kalag ug lawas, sumala sa akong kahimtang. Amen.
(pangadye-on ang usa ka… AMAHAN NAMO…)
IKADUHANG MARTES:
Oh mahigugma-on nga San Antonio! Tungud sa imong pagkamatinumanon sa mga pagtawag kanimo sa Dios, ug tungud sa dili matukib nga kalipay nga imong gibati sa pagdawat mo sa kahimtang nga mahal nga pagka Religioso, idangat mo ako sa gracia nga ikagsunod ko kanimo sa paglakat sa dalan sa mga kahingpitan, ug ikagtuman ko sa akong mga katungdanan, sumala sa akong kaugalingon.
(pangadye-on ang usa ka ..AMAHAN NAMO..)
IKATULONG MARTES:
Oh maloloy-on uyamut nga San Antonio! Tungud sa imong kanunay nga paghigugma sa mga virtudes ug pagtamay sa mga vicio, ug tungud man usab sa walay sama nga kalipay nga imong gibati sa pagsul-ob na kanimo niadtong bililhon nga bakus ni San Francisco, idangat ako sa Ginoo sa santos nga gracia nga mao ang makaanyag sa akong kalag, ug nga makabaskog unta kaniya aron dili mahulog sa mga kadautan ug kangil-aran sa sala nga mortal.
(pangadye-on ang usa ka..AMAHAN NAMO…)
IKAUPAT NGA MARTES:
Oh mapailubon uyamut nga San Antonio! Tungud sa imong mainit nga tinguha sa pagtudlo sa mga katawhan sa kamatuoran, ug tungud man usab sa dakung kalipay nga imong gibati sa pagkita mo nga gidayandayanan ka sa Dios sa usa ka hataas ug katingalahan nga kinaadman tungud sa halawom nga pagpaubus mo, idangat ako sa Ginoo sa gracia nga takus ko ikatudlo sa akong isigkatawo sa paghupot sa mga virtudes, uban sa akong maayong pagpasunod ug pagpuyo sa usa ka santos nga kinabuhi. Amen.
(Pangadye-on ang usa ka…AMAHAN NAMO…)
IKALIMANG MARTES:
Oh mahimayaon nga San Antonio! Tungud sa mahal uyamut nga mga hiyas nga gidayandayan sa Dios sa imong santos nga kalag nga nakahatag kanimo sa dili arang ikag-asoy nga kalipay, idangat ako sa Ginoo sa gracia nga ikadasig sa akong kasingkasing sa pagbalus kaniya sa daghan ug dili maisip nga mga kaayohan nga sa adlaw-adlaw akong ginadawat sa iyang diosnon nga mga kamut. Amen.
(Pangadye-on ang usa ka…AMAHAN NAMO…)
IKAUNOM NGA MARTES:
Oh mahigugmaon nga San Antonio! Tungud sa imong makagagahum nga panabang sa atubangan sa Dios, ug tungud man usab sa mga kalipay nga langitnon nga imong nadawat sa Diosnon nga Bata, diha sa iyang pagpakita ug pagduaw kanimo, idangat ako kang Jesus sa ngatanan nga mga gracias nga labi kong kinahanglan sa pagbaton sa usa ka hingpit nga pag-alagad kaniya, aron unya mahimo akong takus nga kalawaton sa iyang diosnon nga mga bukton. Amen.
(Pangadye-on ang usa ka…AMAHAN NAMO…)
IKAPITONG MARTES:
Oh maloloy-on nga San Antonio! Tungud sa imong mainit nga paninguha nga ang mga tawong tanan makakaplag unta sa kahusayan sa ilang mga kasingkasing, ug tungud man usab sa dakung kalipay nga imong gibati sa pagpakita mo sa daghan nga mga herejes nga nangakabig mo sa santos nga pagtoo, idangat ako sa gracia nga ikadaug ko sa akong mga kaaway nga infiernohanon, ug ikahuput sa virtud sa pagdaut nga mao unta ang maghari gihapon sa akong kalag. Amen.
(Pangadye-on ang usa ka..AMAHAN NAMO…)
IKAWALONG MARTES:
Oh mahinuklogon uyamut nga San Antonio! Tungud sa imong daghang mga panabang nga sa adlaw-adlaw nadawat sa imong mga devotos ug tungud man usab sa walay sama nga kalipay nga imong gibati sa pagkita mo nga bisan ngani ang mga binuhat nga walay salabutan nanagpamati sa imong mga pulong nga matam-is ug sa tungud ning dakung katingad-an, nangakabig mo ang daghang mga tawo sa pagpamati sa imong santos nga wali, nangamuyo ako kanimo nga imo akong panabangan niadtong makalilisang nga adlaw sa paghukom sa Dios kanako. Amen.
(Pangadye-on ang usa ka..AMAHAN NAMO…)
IKASIYAM NGA MARTES
Oh mahimaya-on nga San Antonio! Tungud niadtong ulusahon nga gracia nga gitugot sa Dios kanimo aron ikaw nga mahimong manlalaban sa ngatanan namong mga kalisdanan, ug tungud man usab sa walay ikapananglit nga kalipay nga gibati sa pagtan-aw mo sa imong mga devotos nga nakakaplag sa kaayohan gikan sa imong mahal nga mga panabang idangat ako sa Dios sa gracia nga ikaghuput ko sa virtud sa pag-antus sa ngatanan nga mga kagul-anan niining kinabuhi nga himalatyon aron unya madangat ko ang mga kalipay nga langitnon. Amen.
(Pangadye-on ang usa ka..AMAHAN NAMO…)
IKANAPULONG MARTES
Oh mahigugma-on nga San Antonio! Tungud niadtong mga kalipay nga espirituhanon nga maoy naghari gihapon sa imong santos nga kalag nga gitinguha mo man nga mao usab unta ang maghari sa ngatanan nga mga kasingkasing, ug tungud man usab sa walay tupong nga kalipay nga imong gibati sa pagtan-aw mo nga nakawang lamang ang pagbutangbutang kanimo sa imong mga kaaway, kay naila man gayud sa ngatanan ang imong pagka walay sala, idangat ako sa Ginoo sa gracia nga ikagpuyo ko unta sa usa ka kinabuhi nga malipayon diha sa santos nga pag-alagad ko kaniya hangtud sa akong kamatayon. Amen.
(Pangadye-on ang usa ka..AMAHAN NAMO)
IKAPULO UG USA NGA MARTES
Oh maloloy-on nga San Antonio! Tungud sa madasigon nga pagbansay sa ngatanan nga mga virtudes ug mga buluhaton sa santos nga pagtoo, ug tungud man usab sa daku uyamut nga kalipay nga miabut kanimo sa pagkita mo nga ang imong amahan naluwas sa mga pagdaut sa iyang isigkatawo, idangat ako sa Dios sa gracia nga ikasantos ko sa akong kalag ug ikalipay ko sa daghang mga ikadaut ug mga limbong nga kalibutanon, aron unya mahimo akong takus nga makadangat niadtong malinaw nga dunggo-anan sa pagkaluwas nga dayon sa langit. Amen.
(Pangadye-on ang usa ka..AMAHAN NAMO)
IKAPULO UG DUHA NGA MARTES
Oh mahimaya-on nga San Antonio! Tungud sa imong mainit nga tuyo nga ang tanang mga katawhan mahisaka unta sa langit uban kanimo, ug tungud man usab sa dili arang matukib nga himaya nga imong gibati niadtong unang pagsulud mo sa Jerusalem nga langitnon, idangat ako sa mga panabang nga diosnon, nga ikaghigugma ko sa Dios labi sa ngatanan, aron unya mahimo akong takus nga mahiagum uban kanimo sa mga kalipay ug himaya nga walay katapusan. Amen.
(Pangadye-on ang usa ka..AMAHAN NAMO)
IKAPULO UG TULONG MARTES
Oh mahinuklogon uyamut nga San Antonio! Tungud niadtong nagkasiga nga paghigugma mo kang Jesus sa dinhi pa ikaw sa kalibutan, ug tungud man usab sa dili arang ikag-asoy nga mga kalipay nga miabut kanimo sa paghigugma mo na nga tiunay kaniya karon nga anaa ka na sa langit, idangat ako sa Ginoo sa gracia nga ikaghupot ko sa usa ka hingpit ug tim-us nga paghigugma kaniya ning kinabuhi nga umalagi lamang aron unya mahimo akong takus nga makasaulog ug makaghigugma kaniya sa wala nay katapusan nga himaya sa langit. Amen.
(pangadye-on ang usa ka..AMAHAN NAMO…)
ROSARYO NI SAN ANTONIO
ORASYON SA PANGANDAM
Bukha, Ginoo, ang akong mga ngabil aron pagdayeg sa imong Santos uyamut nga ngalan ug ang sa imong bililhong Inahan, ang Bulahang Ulay nga Maria sa pagpangadye sa napulog tolo ka Amahan Namo, Maghimaya ka Maria ug Gloria Patri (Glory be..) alang sa kadungganan sa Imong alagad nga si Antonio kansang mga maayong buhat akong gipaninguha, uban sa imong panabang, pag-awat dinhi sa yuta, aron unya pagpahimulos sa Imong kahimaya-an didto sa langit. Hina-ut pa unta.
V. Domine Labia Mea Aperies.
R. Et os meum anuntiabit laudem tuam.
V. Deus in adjutorium meum intende.
R. Domine, ad adjuvandum mefestina.
MGA PANGALIYA
1. 1. San Antonio de Padua, Magsasangyaw tungod sa pagtoo, ig-ampo mo kami.
(AMAHAN NAMO..MAGHIMAYA KA MARIA..GLORIA PATRI..) mention your request.
2. 2. San Antonio de Padua, Amahan tungud sa paglaum, ig-ampo mo kami….
(AMAHAN NAMO..MAGHIMAYA KA MARIA..GLORIA PATRI..) mention your request.
3. 3. San Antonio de Padua, anghel tungud sa kalooy, ig-ampo mo kami…
(AMAHAN NAMO…etc…) mention your request
4. 4. San Antonio de Padua, nga nagbansay ka sa kaaghup ug kamapaubsanon ni Jesus, ig-ampo mo kami..
(AMAHAN NAMO…etc…)mention your request
5. 5. San Antonio de Padua, anghel sa kaulay ig-ampo mo kami…
(AMAHAN NAMO…etc..)mention your request
6. 6. San Antonio de Padua, kahibulungan sa pag-antus, ig-ampo mo kami…
(AMAHAN NAMO…etc..)mention your request
7. 7. San Antonio de Padua, salamin sa kamasinugtanon, ig-ampo mo kami..
(AMAHAN NAMO..etc..)mention your request
8. 8. San Antonio de Padua, sinakit tungud sa pailub, ig-ampo mo kami…
(AMAHAN NAMO..etc..)mention your request
9. 9. San Antonio de Padua, kirubin sa pag-ampo, ig-ampo mo kami…
(AMAHAN NAMO..etc..)mention your request
10. 10. San Antonio de Padua, magbalantay kun mag-uuna sa katarungan, ig-ampo mo kami…
(AMAHAN NAMO…etc…)mention your request
11. 11. San Antonio de Padua, panigingnan sa kasarangan, ig-ampo mo kami…
(AMAHAN NAMO..etc..)mention your request
12. 12. San Antonio de Padua, mutya sa kakabus, ig-ampo mo kami…
(AMAHAN NAMO…etc..)mention your request
13. 13. San Antonio de Padua, sulundon sa kamanunayon, ig-ampo mo kami…
(AMAHAN NAMO…etc..)mention your request
ANG TOLO KA MAGHIMAYA KA MARIA
1. 1. Ulay putli uyamut saw ala pa mag-anak, ig-ampo mo kami
(MAGHIMAYA KA MARIA…GLORIA PATRI)
2. 2. Ulay putli uyamut sa pagpanganak, ig-ampo mo kami Maghimaya ka Maria.
(MAGHIMAYA KA MARIA..GLORIA PATRI..)
3. 3. Ulay putli uyamut sa human na mag-anak ig-ampo mo kami Maghimaya ka Maria..
(MAGHIMAYA KA MARIA..GLORIA PATRI..)
RESPONSORYO NI SAN ANTONIO
Tan-awa, kon buut kag katingalahan;
Nanghilayo ang sayup ug kamatayon
Nanghikling ang kaalaut, kayawaan;
Nangaayo ang sanlahon ug masakiton.
Magmalinawon ang kadagatan,
Ang binilanggo nangaluwas,
Ang nangawala hingkaplagan.
Ang kadaut nahalayo na
Mga kabus gihinabangan;
Kana maoy sulti sa taga-Padua,
Nagmalinawon ang kadagatan…
Himaya sa Amahan, Himaya sa Anak, Himaya sa Espirito Santo.
Nagmalinawon ang kadagatan…
Tungud kanamo mag-ampo ka kang Cristo,
San Antonio nga dyosnon ug Santo
Aron kami mahimong takus
Sa iyang mga gisaad. Hinaut pa unta.
PAG-AMPO
Himoa, Oh! Ginoo, nga ang panabang ni San Antonio nga kompesor makapuno unta sa kalipay sa Imong Simbahan, aron kapanalipdan unta sa kalagnong panabang, ug mahimo untang takus sa kalipayng walay katapusan. Tungud kang Cristo nga atong Ginoo. Hinaut pa unta.
SIGN OF THE CROSS
